सुण लो गुरुगम ग्यान निहारी। 

🕉️🎯👌🏻श्री हरिपुरुषाय नमः🌍🫂 

Sun Lo Gurugam Gyaan Nihaari

रामदेव बाबा भजन Ramdev baba 

सुण लो गुरुगम ग्यान निहारी। 

गुरु किरपा गोविंद गत जाणौ, 

आय भरोसौ भारी॥ 

ग्यानी गुरु दुख सगळा मेटै, 

अग्यानी उळझावै। 

मंगता  आगे  मंगता  मांगै, 

भूलि औरहि भुलावै॥ 

गुरु बिन ग्यान ध्यान नईं पावै, 

संसय कौण मिटावै। 

सरणै   आया    संका    मेटै, 

निरभै  मुक्ती  पावै॥ 

केई गुरु इसा आरंभ कर, 

ढोंग पाखंड चलावै। 

पेरै भेख भरम रा भाण्डा,

 यूँ कांईं मुक्ति पावै॥ 

भेदी जकौ भरमै नई कदै,

नीं पाखंड बणावै। 

वेद सास्त्र  परचै  करिया, 

भळै न पाछौ आवै॥ 

आपो नई खोजै औरां नै परमोदै, 

भूल्या नै भरमावै। 

जळ    डूबै   जळ   गह   धारा, 

दूणौ पींदै जावै॥ 

अग्यानी गुरु कबहुँ न कीजै, 

निश्चय नाव डुबोवै। 

ज्यूं सांग  बहुरूपिया बाजी,

 यूँ भूलि भेख बणावै॥ 

सिमरथ गुरु सांसो सब मेटै, 

निज मन होय धियावै। 

लट भंवराँ ज्यूँ गत होई जाई, 

होय भंवर उड़ जावै॥ 

घर-घर में चेला कर लेवै, 

स्वारथ लोभ लगावै। 

आसा लागी आसरी बांधै, 

चादर धोती मंगावै॥ 

गुरु गोविंद एक कर जाणौ, 

चवदह लोकहि गुरु सम नांईं। 

गुरु महिमा बरणी नहि जावै, 

वेद सास्त्र सगळा गावै॥ 

बालिनाथ गुरु सेन बताई, 

निज धरम रै मांही। 

अजमल सुत रामदे भाखै, 

आप में आप समाई॥

🚩जय श्री गुरु महाराज जी की🙏🏻